Chapter 26
1 Ol Livaet* we oli stap gad long haos* blong Hae God, nem blong ol lida blong olgeta i olsem. Long ol laen* blong Kora, i gat Meselemia wetem ol famle blong hem, mo Obededom wetem ol famle blong hem. Meselemia ya papa blong hem Kore, we i kamaot biaen long Asaf ya bifo,
2 mo hem i bonem seven pikinini boe blong hem we nem blong olgeta, i stat long fasbon, i go kasem lasbon i olsem. I gat Sekaraea, mo Jediael, mo Sebadia, mo Jatniel,
3 mo Elam, mo Jehohanan, mo Eliehoenae.
4 Mo Obededom ya, Hae God i mekem i gud tumas long hem, we i givim eit pikinini boe long hem, we nem blong olgeta, i stat long fasbon, i go kasem lasbon i olsem. I gat Semaea, mo Jehosabad, mo Joaha, mo Sakara, mo Netanel,
5 mo Amiel, mo Isakara,* mo Pehuletae.
6 Long famle blong Obededom, i gat sikisti tu man we oli nambawan man blong wok ya,
7 mo long famle blong Meselemia, i gat eitin man bakegen we oli strong man blong wok ya.
8 Nao King Deved i seraot ol famle blong ol gad ya i go long ol grup, mo ol grup ya oli kasem ol wok blong olgeta long haos blong Hae God long sem fasin we ol narafala Livaet oli kasem.
9 Nao nating we ol famle ya oli plante no oli no plante, be ol lida blong olgeta oli sakem ol spesel ston* blong faenemaot se wanem doa nao ol famle ya wanwan oli save gad long hem.
10 Nao long fasin ya, Meselemia i stap gad long doa ya long saed i go long is, mo pikinini blong hem Sekaraea, we i man blong givim gudfala tingting long man, hem i stap gad long doa ya long saed i go long not.
11 Obededom i stap gad long doa ya long saed i go long saot, mo ol pikinini blong hem oli stap gad long ol storum.
12 Tufala man ya Supim mo Hosaha, tufala i stap gad long doa ya long saed i go long wes, mo long doa ya we nem blong hem "Saleket Doa", we i blong go long rod ya we i pas antap. Oltaem, ol gad oli stap gad long ol doa ya gogo taem blong olgeta i finis, nao ol narawan oli kam tekem ples blong olgeta.
13 Evri dei, long doa ya long saed i go long is, i gat sikis gad oli stap gad, mo long doa ya long saed i go long not i gat fo gad oli stap gad, mo long doa ya long saed i go long saot i gat fo gad oli stap gad, mo i gat fo gad oli stap gad long ol storum, tu long wan, tu long wan.
14 Mo klosap long vranda ya long saed i go long wes, i gat fo gad oli stap gad long saed i go long rod, mo i gat tu gad i stap gad long vranda ya.
15 Hemia nao ol wok blong gad we ol laen blong Kora mo ol laen blong Merari oli holem.
16 Mo ol Livaet* we oli holem ol narafala wok long haos* blong Hae God, oli stap lukaot long ol gol mo ol silva mo ol nara gudgudfala samting we i blong yusum long haos ya, mo oli bos long ol storum we oli putum ol samting we ol man oli givim finis i go long Hae God. Ol stamba blong ol laen* blong olgeta ya i olsem.
17 Mo ol laen blong Amram, wetem ol laen blong Ijara, mo ol laen blong Hebron, mo ol laen blong Usiel, olgeta ya tu oli gat wok blong olgeta long ples ya.
18 Sebuel ya we i kamaot biaen long Gesom ya we hem i pikinini blong Moses ya bifo, hem i bos long olgeta we oli stap lukaot long ol gol mo ol silva mo ol nara gudgudfala samting we i blong yusum long haos ya.
19 Oltaem oli stap tekemaot haf blong ol samting we oli karemaot long taem blong faet, oli stap givim i go long God, blong ol man blong hem oli save yusum long ol wok long haos blong hem.
20 Mo i gat ol narafala samting tu we Profet Samuel i givim, wetem ol samting we King Sol i givim, mo ol samting we Abnere, we papa blong hem Nere, mo Joab, we mama blong hem Jeruia, tufala i givim. Olgeta samting ya, ol man oli givim i go long Hae God, blong ol man blong hem oli yusum long haos blong hem, mo Selomit olgeta oli stap lukaot long olgeta evriwan.
21 Nao i gat ol narafala Livaet* we oli gat wok blong olgeta, mo olgeta ya tu oli laen* blong Livae.* Long ol laen blong Ijara, i gat Kenania wetem ol pikinini blong hem, we wok blong olgeta i blong lukaot long ol ripot, mo blong stretem ol trabol blong ol laen blong Isrel.*
22 Mo long ol laen blong Hebron, i gat Hasabia wetem wan taosen seven handred man bakegen we olgeta evriwan oli blong laen ya, mo olgeta evriwan oli nambawan man blong wok. Olgeta ya oli bos long ol wok blong Hae God, mo long ol wok blong king tu, olbaot long haf ya blong Isrel, narasaed Jodan Reva saed i kam long wes.
23 Mo long taem ya, Jeria i nambawan haeman blong laen ya. Mo long namba foti yia blong King Deved we hem i stap rul, ol man blong hem oli lukluk bakegen long histri blong laen ya blong Hebron, mo oli faenemaot we i gat ol nambawan soldia oli kamaot biaen long hem, we oli stap long distrik ya Gilead, long taon ya Jasere.
24 Nao king i jusumaot tu taosen seven handred nambawan man long olgeta, we oli hed blong ol famle blong olgeta, mo i putum olgeta oli bos long ol wok blong Hae God, mo long ol wok blong hem tu, olbaot long haf ya blong Isrel narasaed Jodan Reva saed i go long is, long distrik ya Ruben,* mo long distrik ya Gad,* mo long haf blong distrik ya Manase* saed i go long is.