Chapter 2
1 Nao taem Profet Jona i stap insaed long bel blong bigfala fis ya, hem i prea long Hae God we i God blong hem, i talem se,
2 "Hae God. Taem mi stap long trabol, mi krae i kam long yu, nao yu lesin long mi mo yu ansa long mi. Mi harem se mi stap finis long Hom* blong ol Dedman, be mi prea long yu blong yu givhan long mi, nao yu harem mi.
3 "Yu yu sakem mi mi godaon long solwota we i dip we i dip, nao solwota i kavremapgud mi, mo ol bigbigfala si oli stap brok antap long mi.
4 Mi mi ting se yu sakemaot mi finis long fes blong yu, nao bambae mi no save luk tabu haos* blong yu bakegen.
5 Mi mi dring solwota we klosap mi ded from, solwota ya i kavremap mi olgeta, mo gras blong solwota i fulap long hed blong mi.
6 Mi godaon olgeta, long stamba blong ol bigbigfala hil aninit long solwota. Mi harem olsem we mi go insaed long get blong Hom* blong ol Dedman, blong stap wetem olgeta, we get ya i no save open bakegen samtaem. Be yu Hae God, yu God blong mi, mo yu tekemaot mi bakegen long ples ya, we mi stap gud nomo.
7 Hae God. Taem mi harem we klosap laef blong mi i lus, mi tingbaot yu, mi prea long yu. Nao yu yu harem prea blong mi we i kam kasem yu long tabu haos blong yu.
8 Olgeta we oli stap prea long ol narafala god, oli lego yu finis, oli no moa tingbaot yu.
9 !Be mi bambae mi sing blong presem nem blong yu! Bambae mi tekem wan anamol, mi mekem sakrefaes long hem blong mekem wosip long yu, mo blong talem tangkiu long yu. Mo bambae mi mekem ol wok ya we mi promes* long yu blong mekem. Yu, Hae God, yu nomo yu sevem mi."
10 Nao Hae God i tok long fis ya, mo fis ya i goso, i traot, nao wantaem nomo Profet Jona i kamaot i foldaon long sanbij.