Chapter 6
1 Nao bakegen, Hae God i givim tok blong hem long Moses
2 blong i go talemaot long ol laen* blong Isrel.* Hem i talem se, "Moses. Sipos wan man no wan woman i wantem mekem promes long mi se bambae hem i kam wan Nasiraet,* we i tabu, i spesel man blong mi,
3 bambae hem i no mas dring waen mo ol narafala dring we i save mekem man i drong. Hem i no mas dring ol dring we ol man oli stap wokem long grep,* mo i no mas kakae ol frut blong rop ya tu, nating we oli tekem we i jes raep no i sandrae.
4 Sipos man i kam Nasiraet, bambae i tabu blong hem i kakae wan samting blong rop ya, nating we sid blong hem, no skin blong frut blong hem, be i tabu blong hem i kakae.
5 "Mo sipos wan man i mekem promes long mi mo i kam Nasiraet, man ya i kam tabu, i man blong mi. Mo hem i mas holem promes ya blong hem gogo kasem en blong taem ya we hem i putum, mo hem i mas letem hea blong hem mo mustas blong hem i gru go kasem en blong taem ya.
6 Olwe long taem ya we hem i Nasiraet, hem i tabu, i man blong mi.
7 "Mo sipos wan man i ded wantaem nomo klosap long wan Nasiraet, samting ya i mekem hea blong Nasiraet ya i no moa klin long fes blong mi, i no moa tabu. Nasiraet ya i mas wet go kasem we seven dei i pas, nao hem i mas sevemaot hea blong hem wetem mustas blong hem, blong kam klin bakegen long fes blong mi.
8 Nao long namba eit dei blong hem, hem i mas tekem tu sotleg* no tu nawimba i kam long pris long doa blong yad blong Haos Tapolen blong mi.
9 Nao pris i mas tekem wan long tufala pijin ya, i mekem spesel sakrefaes ya blong tekemaot sin blong man ya, mo i mas tekem narawan, i mekem sakrefaes ya we i bonem i bon evriwan blong mekem wosip long mi. Pris i mas mekem ol samting ya blong mekem Nasiraet ya i klin bakegen long fes blong mi, from we hem i stap klosap long man ya taem i ded. Nao long sem dei ya nomo, man ya bambae i mas mekem promes, se taem hea blong hem i gru, bambae i tabu, i blong mi bakegen,
10 mo hem i mas mekem narafala promes long mi bakegen, se bambae hem i tabu, i man blong mi blong hamas yia ya bakegen we hem i promes blong mekem fastaem. Bambae hem i no save kaontem ol yia ya blong hem blong fastaem, from we dedbodi ya i mekem hea blong hem i no moa klin long fes blong mi. Mo hem i mas tekem wan smol sipsip i kam we i gat wan yia blong hem, blong mekem sakrefaes long hem blong mekem hem i klin bakegen long fes blong mi.
11 "Nao pris i mas givim olgeta samting ya i kam long mi. Hem i mas mekem spesel sakrefaes ya blong tekemaot sin, mo sakrefaes ya we i blong bonem i bon evriwan,
12 mo hem i mas mekem sakrefaes long narafala man sipsip ya we hem i bonem haf, man ya i kakae haf blong soemaot we hem i stap fren gud wetem mi. Mo taem hem i bonem sakrefaes ya, hem i mas givim basket kakae ya tu i go wetem, mo i mas tekem ol narafala kakae mo waen, i givim i kam long mi.
13 Long taem ya, Nasiraet ya i mas kam stanap long doa blong yad blong Haos Tapolen blong mi, mo i mas sevemaot ol hea blong hed blong hem, mo i mas bonem long faea ya we pris i stap bonem haf blong man sipsip ya long hem.
14 "Nao pris i mas kukum narafala haf blong man sipsip ya, mo taem i tan, hem i mas tekemaot solda blong hem, i tekem i kam long Nasiraet ya, i putum long han blong hem wetem wan bred we i no gat is long hem, mo wan bisket, we i tekemaot tufala long basket ya.
15 Nao biaen, hem i mas tekemaot ol samting ya bakegen, i leftemap olgeta long fes blong mi blong givim olgeta i kam long mi. Olgeta samting ya i tabu, i spesel presen long pris blong hem i kakae. Presen ya i antap long jes mo leg blong man sipsip ya we Loa i talem se i blong pris. Nao biaen, Nasiraet ya i save dring waen bakegen.
16 "Hemia nao ol rul blong Nasiraet. Be sipos wan Nasiraet i promes blong givim sam samting i kam long mi we i bitim mak we ol rul ya i talem, hem i mas mekem samting ya stret olsem we hem i promes blong mekem."
17 Nao bakegen, Hae God i givim tok blong hem long Moses
18 blong i go talemaot long Hae Pris Eron wetem tufala pikinini ya blong hem. Mo Moses i go talemaot we Hae God i talem se, "Eron. Yu wetem tufala pikinini blong yu, mo olgeta we bambae oli stap kamaot biaen long yufala, sipos yufala i blesem ol laen* blong Isrel,* bambae yufala i mas talem se,
19 ‘Prea blong mi, we Hae God bambae i blesem yu, mo i stap lukaot gud long yu,
20 hem bambae i kaen gud long yu, mo i gat sore long yu,
21 hem bambae i stap lukluk i kam long yu oltaem, blong givhan long yu long gladhat blong hem, mo hem bambae i givim pis long yu.’
22 Mo sipos yufala i blesem ol man long nem blong mi, mi bambae mi blesem olgeta."