Chapter 7
1 "He teka rānei, kua takoto he pakanga mō te tangata i runga i te whenua, he rite anō ōna rā ki ngā rā o te kaimahi?
2 E rite ana ki te pononga, e matenui nei ki te ātārangi, ki te kaimahi, e tūmanako nei ki te utu mō tāna mahi;
3 koia tōku rite, ka whiwhi nei ki ngā marama horihori, ā, he māuiui ngā pō kua whakaritea mōku.
4 Ka takoto ahau, ka mea ahau, ‘Āhea ahau ara ai?’ He roa ia te pō; heoi ka tāhurihuri kau ahau ā ao noa.
5 Ko te kākahu mō ōku kikokiko he kutukutu, he pōkuru oneone; ka kukuti tōku kiri, ā, ka ngātata anō.
6 Ko ōku rā hohoro atu i te rākau a te kaiwhatu; pau ake, tē ai he tūmanakohanga atu.
7 "Kia mahara he hau ōku rā; heoi anō kitenga o tōku kanohi i te pai.
8 Ko te kanohi o te tangata e kite ana i ahau, heoi anō tōna tirohanga mai ki ahau; kei runga i ahau ōu kanohi, heoi kāhore iho ahau.
9 Memeha atu te kapua, ngaro atu; he pērā anō te tangata e haere ana ki te urupā; e kore e hoki ake.
10 E kore ia e hoki mai anō ki tōna whare, e kore anō tōna wāhi e mahara ki a ia i muri.
11 "Nā, e kore e kaiponuhia e ahau tōku māngai; ka kōrero ahau i tōku wairua e mamae nei; ka tangi i te kawa i tōku ngākau.
12 He moana rānei ahau, he tohorā, i mea ai koe i te kaitirotiro mōku?
13 Ki te mea ahau, ‘Kei tōku moenga ahau te mārie ai, mā tōku takotoranga e whakamāmā tāku tangi.’
14 Nā, ka whakahaehaetia ahau e koe ki ngā moe, ka whakawehia ahau ki ngā mea e whakakitea mai.
15 Ā, ki tā tōku wairua he pai te tārona; pai ake te mate i ēnei wheua ōku.
16 E whakarihariha ana ahau ki tōku ora; kāhore ōku hiahia kia ora tonu ahau. Waiho noa iho ahau, he mea teka noa hoki ōku rā.
17 "He aha te tangata, i whakanuia ai e koe? I anga ai tōu ngākau ki a ia?
18 I titiro ai koe i a ia i tēnei ata, i tēnei ata, i honohono ai tāu whakamātautau i a ia?
19 Kia pēhea ake te roa ōu kāhore nei e tahuri atu i ahau, ōku kāhore nei e waiho noa iho e koe, kia horomia ai tōku hūware?
20 Mehemea kua hara ahau, kia aha atu ahau ki a koe, e te kaitiaki o ngā tāngata? He aha ahau i waiho ai e koe hei patunga māu, i taimaha iho ai ahau ki ahau anō.
21 He aha koe tē whakarere noa ai i tōku hē, tē whakapahemo ai i tōku kino? Ākuanei hoki ahau moe ai ki te puehu, ā, ka āta rapu koe i ahau, otiia kāhore noa iho ahau."