Chapter 143
1 E Ihowā, whakarongo ki tāku īnoi, kia tītaha mai tōu taringa ki āku īnoi; whakahokia mai he kupu ki ahau i runga i tōu pono, i runga i tōu tika.
2 Ā, kaua e anga e whakawā ki tāu pononga; ki tāu titiro hoki kāhore tētahi mea ora e tika.
3 Kua tūkinotia hoki tōku wairua e te hoariri, patua iho e ia tōku ora ki raro ki te whenua; meinga ana ahau e ia kia noho i ngā wāhi pōuri, kia rite ki ngā tūpāpaku onamata.
4 Nā reira i ngaro ai tōku wairua i roto i ahau; mōtī rawa tōku ngākau i roto i ahau.
5 E mahara ana ahau ki ngā rā onamata; e whakaaro ana ki āu mahi katoa, e whakaaroaro ana ahau ki ngā meatanga a ōu ringa.
6 Totoro tonu atu ōku ringa ki a koe; e hiainu ana tōku wairua ki a koe, ānō he whenua māuiui. Hera
7 Hohoro te whakahoki kupu mai ki ahau, e Ihowā; ka hemo tōku wairua. Kei hunā tōu mata ki ahau; kei rite ahau ki te hunga e heke ana ki te poka.
8 Meinga kia rongo ahau ki tōu aroha i te ata; e whakawhirinaki ana hoki ahau ki a koe. Meinga kia mātau ahau ki te ara e haere ai ahau; kua ara nei hoki tōku wairua ki a koe.
9 Whakaorangia ahau, e Ihowā, i ōku hoariri; ka kuhu nei ahau ki roto ki a koe.
10 Whakaakona ahau ki te mea i tāu e pai ai; ko koe hoki tōku Atua. He pai tōu wairua; ārahina ahau ki te whenua o te tika.
11 Whakahauorangia ahau, e Ihowā, he whakaaro ki tōu ingoa. Whakaarohia tōu tika, ka whakaputa ake i tōku wairua i roto i te pōuri.
12 Aroha mai hoki, ā, hunā ōku hoariri; whakangaromia katoatia anō ngā kaitūkino o tōku wairua; he pononga hoki ahau nāu.