Chapter 46
1 Imana ni yo buhungiro bwacu n’inkomezi ni umufasha atabura guseruka mu magorwa.
2 Ni co gituma tutazotinya, naho isi yonyiganyiga n’imisozi ikagwa mw’ibenga ry’ikiyaga,
3 naho amazi yaco yosuriranya akuzura ifuro agatera n’imisozi kunyiganyiga.
4 Hari uruzi rufise amazi ahimbara igisagara c’Imana, ahera aho Iyisumbavyose iba.
5 Imana iri muri wo, ntuzonyiganyiga; Imana izowutabara umutwenzi utambitse.
6 Amahanga avugije urwamo, ubwami buranyiganyize; yumvikanishije ijwi ryayo, maze isi irashonga.
7 Uhoraho Mushoboravyose ari kumwe natwe; Imana ya Yakobo ni yo gihome kidukingira.
8 Nimuze murabe ivyo Uhoraho yakoze, ingene yasambaguye isi.
9 Yahagaritse intambara gushika ku mpera z’isi. Yavunaguye umuheto acagagura icumu; yaturiye umukogote mu muriro.
10 Uhoraho aravuga ati: "Nimutekereze, mumenye ko ndi Imana; nzoshirwa hejuru mu mahanga yose, nzoshirwa hejuru mw’isi."
11 Uhoraho Mushoboravyose ari kumwe natwe; Imana ya Yakobo ni yo gihome kidukingira.